وبتلـــكك عـشــــــان أفـــرح
بقلم الشاعرة : دينا السيد لطفي
وبتلكك عشان أفرح وأنسي الجرح والأحزان ،
وبرسم ضحكه علي وشي فقلبي يبان لكم فرحان ،
وأقول بالكدب مبسوطة وأصدق روحي مهما يكون ،
مجايز ( بكره ) يصدقلي وأشوف له
نهار بأجمل لون ،
باقوم من بدري أمضي حضور ‘
وبعمل من - الأمل - دفتر
ما أنا بروح ‘ حلاوه روح ‘
أجيب الصبر بيه وأفطر ‘
وأدور ليا علي كرسي ‘ في وسط قلوب كتير بتدوب ‘
ألاقي مافيش ‘ ألاقي ياناس
مكان الكرسي قالب طوب ‘
محاوله بجد مش أكتر بحاول فيها
علي قدي ‘ .
ما أنا اللي بعيش‘ يادوب سرقة ‘
دقايق - فرح - وتعدي ‘‘
جراحي خام ومختومة بختم النسر في الباسبور ‘
وضحكة وشي في الصورة ‘ مجرد
شكل بس ديكور ‘
ياعم الحج أنا بضحك ‘
لكن القلب فيا حزين
دموعي واقفه بشناطها وجاهزه جنب باب العين..
ورغم الغلب ‘ وعذابي ‘ ورغم دروب
خلفها النصر ‘
بعيش الضحكة ‘ مع إني في قلبي
وروحي مليون كسر ‘
مابستسلمش لو زادت في يوم أوجاعي ودموعي ،
بجيب الضحكه لو من فين وأقيد
من ضيها شموعي ‘
دا مهما القلب يستكفي من الأحزان
بحاول أعيش ،
معايا ربنا فازاي ‘ أنادي غيره
مايسبنيش ‘
محدش فينا ‘ كان قاصد ‘ يعيش
في الكون لوحده يتيم ‘
فمش بإيديا أصحي في يوم ألاقي
عذابي دا الأنتيم ،
شروخ في القلب مش باينه وياما
بتدارينا هدوووم ،
مافيش في الدنيا حال دايم ‘
دوام الحال ده شيء معدوم ،
بطبطب ياما علي نفسي ‘ واشيل
بين حضني ‘ صبر كتير ‘
وأنام عادي ‘ وأقول يمكن ‘
يكون بكره صباح الخير
التعبيراتالتعبيرات